“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 27 Desambra 2009	N° 44
ALAHADY Fetin’NY FIANAKAVIANA MASINA – taona D
Fianakaviana MasiNA : Modely ho antsika. Ny fianankavian’i Maria sy Josefa ary i Jesoa no Fianakaviana Masina ankalazaintsika androany alahady manaraka ny Noely. Fianakaviana tsotra niaina tao anatin’ny fifankatiavana . Tsotra satria Fianakaviana nivelona tamin’ny asa-tanana : rafitra. Ny hatsembohan’ny tavany no nihinanany. Nanaraka ireo fomba fanaon’ny olona teo amin’ny fiarahamonina. Toy ny fiankarana isan-taona any Jerosalema mba hankalaza ny Paka. Tsy nirehareha tamin’ny fananany an’i Jesoa zanak’Andriamanitra fa niezaka nitovy tamin’ny fianakaviana rehetra. Ny fifankatiavana no ranomanitra nandravaka io fianakaviana io. Nifanampy sy niara-niasa i Maria sy Josefa teo amin’ny fanabeazana an’i Jesoa. Endrey ‘zany fitotototoan’izy ireo nitady an’i Jesoa rehefa tsy hitany ny menaky ny ainy. Tsy nanao teny mahery, tsy namelaka tehamaina indray rehefa nahita an’i Jesoa fa nanontany tsotra ny antony tsy niarahany tamin’izy ireo. «  nahoana ianao anaka no dia manao toy izao…. » , hoy i Maria nanontany moramora Azy. Taratry ny Fianakavian’Andriamanitra tokana olona telo io Fianakaviana Masina io. Niara-niasa sy nifankatia Andriamanitra Ray sy Zanaka ary Fanahy Masina. Tsy nisy ny fifandirana teo amin’izy Andriamanitra. Tokana ny tanjona nokendreny dia ny hahatontosa ny fanavotana ny olombelona. Samy nanao ny asany ireo Andriamanitra telo ireo. Tsy nisy nisalovana na nifamingana. Mahavita zavatra tokoa ny fianakaviana rehefa mifankatia. Io fifankatiavana io àry no iraka ampanaovin’Andriamanitra ny fianakaviana tsirairay. Io fifankatiavana io no tian’Andriamanitra hanjaka ao amin’ny fianakaviantsika. Ny fiainan’ny fianakaviana ny fifankatiavana dia ahafantarany fa miara-monina aminy Andriamanitra. Ary io fifankatiavana io ko no irariako hanenika tokatranonareo tsirairay avy.
P. Edmond RAKOTONDRAMANANA, Aumônier

DIMANCHE 27 décembre 2009 – MESSE DE LA SAINTE FAMILLE

Année C – Couleur liturgique : BLANC

Jean-Marie VIANNEY 1786 – 1859

TAONAN’NY PRETRA ANNEE SACERDOTALE Du 19 Juin 2009 au 19 Juin 2010 Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy ankanavaka izy.

& VAKITENY MASINA Voalohany
Boky voalohan’i Samoela			1 Sam. 1, 20 – 22 . 24 - 28
Tamin’izany andro izany i Elkanà dia nahalala an’i Anà vadiny, ary ny Tompo nahatsiaro azy. Ary nony nitsingerina ny andro, dia efa nanana anaka i Anà ka dia tera-dahy izy, ary nataony hoe Samoela ny anarany, fa nangatahiko tamin’ny Tompo, hoy izy. Dia niakatra i Elkanà vadiny sy ny ankohonany rehetra, hanatitra amin’ny Tompo ny sorona fanao isan-taona, sy anefa ny voadiny. Tsy mba niakatra anefa i Anà, fa hoy izy tamin’ny lahy : « Rehefa hitsaha-nono ny zaza dia hoentiko hiseho eo anatrehan’ny Tompo sy hitoetra eo mandrakizay…Nony notazany ny zaza dia efa nentiny niakatra niaraka taminy, sady naka vantotr’omby lahy telo, sy lafarîna iray efah, ary divay eran’ny siny hoditra izy, dia nentiny nankao an-Tranon’ny Tompo tao Silô izy. Mbola tanora kely ny zaza. Dia novonoin’izy ireo ny vantotr’omby lahy iray, ary nentiny nakao amin’i Helî ny zaza. Ka hoy i Anà : « Aza mahafady, Tompoko, raha velona koa ny ainao, Tompoko, dia izaho ilay vehivavy nitoetra teto akaikinao nivavaka tamin’ny Tompo. Ny hahazoako ity zaza ity no nangatahiko, ary neken’ny Tompo ny fangatahana nataoko taminy. Koa inty kosa aho mahafoy azy ho an’ny Tompo ; nafoy ho an’ny Tompo izy amin’ny andro hiainany rehetra ». Dia niankohoka teo anatrehan’ny Tompo izy ireo.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA faharoa
Taratasy voalohan’i Md. Joany Apôstôly			1 Jo. 3, 1 – 2 . 21 - 24
Ry hava-malala, endrey ity haben’ny fitiavan’Andriamanitra antsika, amin’ny iantsoana antsika hoe zanak’Andriamanitra, sady tena zanany tokoa isika ! Fa izao tontolo izao no tsy mahalala antsika, dia noho izy tsy mahalala Azy. Ry hava-malala, zanak’Andriamanitra isika ankehitriny, nefa mbola tsy naseho izay ho tena toetrantsika ; fa amin’ny andro hampisehoana izany, dia fantatsika fa hanahaka Azy isika, satria hahita Azy araka ny tena toetrany. Ry hava-malala, raha tsy manameloka antsika ny fontsika, dia mahazo manatona an’Andriamanitra amin-toky isika. Ary na inona na inona hangatahantsika dia ho azontsika, satria mitandrina ny didiny sy manao izay tsara eo imasony isika. Ary izao no didiny : ny hinoantsika an’I Jesoa Kristy Zanany, sy hifankatiavantsika araka ny didy nomeny antsika. Izay mitandrina ny didiny dia mitoetra ao Aminy, ary Izy kosa ao aminy ; ary ny ahafantarantsika fa mitoetra ao amintsika Izy, dia ny Fanahy Izay omeny antsika.
Izany àry ny Tenin’ny Tompo	-	Hisaorana anie Andriamanitra !

& evanjely masina
Evanjely Masina nosoratan’i Md. Lioka			Lk. 2, 41 - 52
Isan-taona ny ray aman-drenin’I Jesoa dia nankany Jerosalema amin’ny andro fetin’ny Paka ; ka nony efa roa ambin’ny folo taona Izy, dia niakatra araka ny fanao amin’izany fety izany izy ireo. Ary nony tapitra ny andro fety ka nody izy, dia nijanona tany Jerosalema i Jesoa Zazakely, nefa tsy fantatry ny ray aman-dreniny izany. Nataon’izy ireo hoe niaraka tamin’ny niray dia taminy Izy, ka nandeha lalana indray andro vao nitady Azy tamin’ny havany, dia niverina tany Jerosalema indray hitady Azy. Ary nony afaka hateloana, dia hitany tao anatin’ny Tempoly Izy nipetraka teo afovoan’ny mpampianatra, ka nihaino sady nanontany azy, ary talanjona izy rehetra nandre Azy noho ny fahendreny sy ny famaliny. Ary nony nahita Azy izy ireo dia gaga, ary hoy ireniny taminy : “Anaka, nahoana Ianao no nanao toy izany taminay ? Inty irainao sy izaho malahelo mitady Anao”. Fa hoy Izy taminy : “Nahoana no nitady Ahy ianareo ? Tsy fantatrareo va fa tsy maintsy ho ao amin’ny Raiko aho ?” Faingy tsy azon’izy ireo ny teny nolazainy taminy. Dia naira-nidina taminy nankany Nazareta Izy, ary dia nanaiky azy ; fa ireniny kosa nandinika tsara izany zavatra rehetra izany tao am-pony. Ary I Jesoa nitombo fahendrena sy tena, ary nandroso nahateotia tamin’Andriamanitra sy ny olona.
Izany àry ny Tenin’ny Tompo	-	Dera anie ho Anao, ry Kristy !

	( fifampizarana
	Ry Andriamanitra mora fo o ! nomenao hotafianay ny ohatra tsara indrindra mamiratra tao amin’ny FIANAKAVIANA MASINA. Aoka hifandefitra sy hifamela heloka , raha misy manana alahelo amin’ny namany. Aoka ho tahaka ny namelan’ny Tompo heloka anareo no hamelanareo heloka ihany koa. Aoka hitoetra ny fitiavana izay fehin’ny hantsaram-panahy rehetra. Hanjaka ao am-ponareo anie ny fiadanan’ I Kristy, izay niantsoana anareo hiforona ho tena iray. Hitoetra be dia be ao aminareo anie ny tenin’ I Kristy, ka hifampianatra sy hifananatra amin’ny fahendrena rehetra. Ary na inona na inona ataonareo, na amin’ny teny na amin’ny asa dia ataovy amin’ny Anaran’I Jesoa Tompo ny zavatra rehetra. Fahamaotinana amam-pandeferana ,famindram-po amam-piantrana, halemem-panahy amam-panetren-tena, izany rehetra izany dia mifehy ny fiainana FIANAKAVIANA MASINA. Koa mirary soa ho tahin ‘Andriamanitra.
	Edmine RASOLONIRINA
	Vaomieran’ny FIARAHA-MONINA
¦ soritr’asa manaraka
1.		FISAORANA ANTSIKA MIANAKAVY : Misaotra an’Andriamanitra isika fa tanteraka soa aman-tsara ny fankalazana ny Noely. Hatramin’ny fampisehoana nataon’ireo zanatsika, sy ireo tanora ary Antsam-panahy nataon’ny Antoko Mpihira « Feon’Anjomara ». Niredona sy nafana ny Sorona Masina Misasak’alina niarahana tamin’ny Paroasy Saint Dominique. Niara-nikorana isika tamin’ny sakafom-mitam-pihavanana. Izany no fianakaviana masina : mifanara-tsaina, mifanome tanana, mahay mifampizara, satria tsy misara-mianakavy isika eto amin’ny FKMP. Misaotra an’ireo mpikarakara sy mpandamina ny fotoana isan-tokony. Tomombana ny zava-drehetra. Ny tsara hatsaraina hatrany, ny tsy nety harenina. An’Andriamanitra irery ihany ny voninahitra mandrakizay ! Ny Biraom-piangonana
2.		HASIN’ANDRIMANITRA NA DENIER DE L’EGISE 2009 ETO AMIN’NY FKMP : Efa nanomboka tamin’ny alahady 15 novambra teo ny fanentanana antsika mianakavy amin’ny adidy fanao isan-taona eo amin’ny Hasina’Andriamanitra na Denier de l’Eglise. Mifarana ny alahady 27 desambra ny fanantenana.Tsapatsika tokoa fa mila enti-manana ny asa fandraharahana rehetra eto amin’ny Fiangonana, ka notanterahanareo ny tenin’ny Soratra Masina hoe : « fa teren’ny fitiavan’i Kristy antsika izahay…. » 2 Kôr. 5, 14. « Samia manao araka izay izay efa nokasainy tao am-pony avy, tsy amin’alahelo na an-tery, fa mpanome an-kafaliana no sitrak’Andriamanitra » 2 Kôr. 9, 7 Androany alahady fetin’ny Fianakaviana Masina no farany. Koa sao diso anjara amin’izany anjara masina izany ny fianakavianao. Koa manentana antsika mianakavy eo amin’ny famerenana ilay valopy misy ny anjaram-pitiavantsika ho fanohanana ny asa pastôraly fanirahana ny FKMP dia isika mianakavy izany.

” FIZARANA ANDRAIKITRA
1.	MANENTANA LITORIZIA : 03/01/2010: BIRAOM-PIANGONANA
2.	MANADIO FIANGONANA : 02/01/2010 : Ireo vao nandray ny Sakramentan’ny Konfirmasio